Kina mbajti të martën një takim tripalësh të nivelit të lartë me Korenë e Jugut dhe Japoninë, që kishte si objektiv shfaqjen e një fronti të bashkuar për t’i bërë ballë qëndrimeve agresive të Koresë së Veriut.

Kryeministri Li Kequiang priti Presidentin koreano-jugor Moon Jae-in dhe kryeministrin japonez, Shinzo Abe në qytetin jugperëndimor Chengdu, dy ditë para të ashtuquajturës “dhuratë për Krishtlindje nga udhëheqësi koreano-verior, Kim Jong Un. Kim po kërkon lëshime të tjera nga Shtetet e Bashkuara deri në fund të vitit në këmbim të rifillimit të negociatave të bllokuara, që synojnë bindjen e Koresë së Veriut për të hequr dorë nga programi bërthamor.

Në komentet e tij hapëse, presidenti Moon tha se shtimi i tensioneve “nuk është as në të mirë të vendeve tona, as të Koresë së Veriut”.

Takimi tripalësh, u mbajt gjithashtu në klimën e një mosmarrëveshjeje në rritje mes Seulit dhe Tokios, lidhur me disa vendime gjyqësore në Korenë e Jugut, përmes së cilave urdhërohen kompanitë japoneze që të kompensojnë koreanët që ishin detyruar të punonin në komplekse japoneze gjatë Luftës së Dytë Botërore.